escorzaña
Paxina web oficial de la Peña Timoteína Escorzaña
Hestoria
La nuesa hestoria, anque sía curtia, yia perinteresante pola cantidá d'anéudotas ya feitos que nos ocurrieron n'estos anus.
Si bien Escorzaña entamóuse nel anu 2001, pa facer la hestoria bien vamos tener que facer alcordanza d'unos anus anantias, polo menos outro par d'el.los, porque la idea de facer una peña timoteína yá nos rondaba pola cabeza dende tiempu p'atrás. En 1999, compuestos por xente distinta dafeitu a l'actual peña, foi el primer intentu. El nome de la peña iba ser "Curriecho" (Curriel.lu), pero como yia lóxicu nun fuimos a facer nada, si acaso unos chambrones negros ya coloraos pa ir toos iguales. Al igual qu'esi anu, en 2000 volvimos los mesmos ya'l resultáu foi idénticu, nun fuimos quien a facer nada.
Nel 2001 la cousa cambióu, la xente que tábamos ya foi asemeyada a la de l'actual Escorzaña, esi anu al haber modificaciones na xente'l grupu pensamos n'outro nome, ya lo único que fuimos a discurrir foi "Conejera" (coneyera). Con esi nome nun fuimos a nengún sitiu, pero las ganas de ser Peña Timoteína l.leváronnos a facer las primeras pegatinas de nueso, que la verdá touvieron ésitu abondo, porque la gracia yara bien buena. Basámosnos nun fallo de Parrondo (el nuesu mitu), que dixera exactamente: "El cefapólodo de Luarca atrae mucho turismo".
Esi iviernu, con más tiempu pa pensar, tábamos un xueves n'Uviéu ya, de la qu'íbamos salir de folixa prehí, dionos por baxar d'internet un diccionariu d'asturianu, ya pusímonos a buscar daqué que sonara bien ya touviera un significáu afayadizu. Las ganas de salir de casa casi fixeron que lo dexáramos pa outro dia, pero de sópitu vimos "Escorzaña". ¡Qué meyor pal.labra ya que meyor significáu pudimos atoupar!. Dous meses despuós, féxose la peña oficialmente.
Esi branu del 2002 la peña yá foi una xuerga, ficimos unas 2000 pegatinas, 20 socios, amás de la primer páxina Web. Las pegatinas d'esi branu fueron inspiradas,outra vez, en Parrondo, al que vimos n'una "simpática" semeya nel periódico a la vera de Laura Ponte, ya vímonos obligaos a garranos a la gracia fácil, faciendo'l nuesu particular cartel de "La Bella y la bestia".
Esi foi'l nuesu primer San Timoteo cumo peña. A partir d'esi momentu arrexuntósenos muita xente, ya, pasín ente pasu, la peña foi medrando hasta l.legar a lo que yia agora. Las ventas de lotería en Navidá permitiéronnos mercar un carru nel 2004, ya igualo nun taller al amesta-y una tercera rueda, tiradores ya barras (pa'l tresporte de sidra), siendo todo un simbolo de la peña.
D'entós p'acó fuimos quien a facer una peña de las más gayoleras ya numarosas de tol práu de San Timoteo, sacando pegatinas dende tres días anantias del día grande (22), faciendo unos chambrones perguapos (ver material)... Pero nun quisimos quedanos namás n'esos días, yia la peña tien l'oxetivu de caltener l'espíritu timoteínu tol anu: concursu de cerveza, cena-espicha de socios (ya col.lacios) ou preba de sidra van convertíndose, col andar de los anus, en citas ineludibles.